trök nao: "columns"

de bèste sjöt

De bèste sjöt van de ganse sjötterie, ligk inne göt mit de halve sjlieterie. De prachtige äöpening van 'n leedje van Joep Rademakers oet 1962 alweer det alles in zich haet waat Limburg Limburg maaktj. 'n Leedje det al jaorelank mit vastelaovendj mitgezónge wurtj euver ós sjötterieje in ónvervalsj Sjilvends, ein van al die dialecte die oeëts bie-ein es Limburgs erkindj wórte. Vastelaovendj, sjötterieje en Limburgs, ze waere in eine aom genumdj es v'r 't hie euver ós identiteit höbbe.

Euver de vastelaovendj kóste v'r aafgeloupe waek laeze det de populariteit van de oktoberfeste in 't zelfdje tempo greujtj es wo-in det van 't carnaval liektj aaf te numme. Oppe agenda's sjtaon gèn Big Benny's, W-Dreeje, La Bamba's of Beppie's, mer Lederhosen Power, Palemiger Spatzen, Tiroler Teufel, Höhner en Schürzenjäger. Van Alphorn toet Tirol in plaats van Aesjde toet de Mokerhei, van piepke sjoes nao pölle beer. En neet allein mit de vastelaovendj, ouch mit 't Limburgs sjientj 't behuuërlik hel achteroet te gaon es ich alle berichte op Facebook moog gluive.

De bèste sjöt vanne sjötterie, OLS-president Ger Koopmans loog dis daag figuurlik inne göt. In zien rol es gedeputeerdje van ózze cultuur, wis hae nogal get vertegenwoordigers van cultureel vereniginge die zich sjterk make veur 't Limburgs te sjoffere. Häöre nota euver 't dialecbeleid wórt door häöm nao de prullebak verweze en zien opmerking det 't Limburgs neet zów besjtaon, veel dudelik neet in goje löss. Gister, nog veur d'n haan drie keer gekrejdj hej, trok hae ziene keutel weer in en leet wete det d'r in 'n toekómstig cultuurbeleid genóg ruumdje zów zeen veur det eigeste Limburgs. Mit zoeë'n drejkóntj es bèste sjöt zóws se dich onnag 'ns zörg mótte gaon make euver de toekóms van ózze sjöttecultuur.

© jan sjure, 2 oktoeëber 2015