trök nao: "columns"

tik !

Tik! Ich kin mich neet heuge oeëts zoeë'n kort e-pöske gekrege te höbbe es aafgeloupe waek. 't Koom van 'ne troewe laezer dae dökker reageertj op ein van mien sjrieverieje. Drie letterkes en 'n oetroopteike wore mieër es genóg óm mien meining van vurrige waek te óngersjteune. Anger reacties die ich kreeg, hejje hieël get mieër wäörd nuuëdig óm meininge oet te drökke die eigelik allemaol op 't zelfdje neerkome: Tik! Det ózze gedeputeerdje mit ziene 'tik' behuuërlik naeve 't plenkske hej getiktj mit zien opmerkinge euver 't Limburgs, dao wore de meiste 't diek euver ins.

Mien gefilosofeer euver de achteroetgank vanne vastelaovendj aevel, vónj gein gewillig gehuuër. 'n Versjtoktj, en ich vermoed noe al verklèdj fieësbieëst leet wete det euver 'ne goje maondj 't heiligste van alle heiligste weer geäöpendj wurtj en gènne echte Limburger d'r den nog bezej van haet det 't oeëts oktoeëber is gewaes. Veur waat 't waerd is dink ich den mer.

Oeteindelik ging 't allemaol euver 't Limburgs en de neet te vermieje constatering det 't allemaol achteroet geit mit os taal. Zoeëgaar de gedeputeerdje van cultuur kin dao väöl aan doon. Det ós provincie aevel de kraan dichdrejdje veur de LiLiLi-daag, 'n cultureel jäörliks huuëgdjepuntj, woor veur de organiserendje oetgaeverie TIC, zoeë'ne tik det besjlaote mós waere 't evenement dit jaor veur de lèste keer te haoje. Inne ECI-cultuurfabriek kin, drie daag veur de äöpening van 't 'alderheiligste', gepreufdj gaon waere aan zoeë'n bietje alles waat 't Limburgs te beje haet. Inj oktoeëber kin 't zelfdje geveul belaefdj waere bie 't Limburgs Preuve in Lin. Groeëte opkomste zówwe 'n lekker tikske zeen oppe d'r ónger gesjtaoke sjouwers van idderein dae d'r 'n sjteinke aan bie geit drage.

© jan sjure, 9 oktoeëber 2015