trök nao: "columns"

óngerboewdj

Aafgeloupe waek bezóch ich 'n congres in Italië wo ich op oetnuuëdiging get móch presentere. Óndanks det ich gevraogdj wórt, mós ich 'n half jaor geleje 'n samevatting opsjture die door 'n congrescommissie van gelieërdje luuj beoordeeldj wórt. 'Peer-review' wurtj det genumdj. Zoeë zeen de organisatore van congresse d'r van verzekerdj det alles waat op 't programma kumtj, gebaseerdj is op óngerzeuk wie óngerzeuk gedaon mót waere. Alles waat gepresenteerdj wurtj, is óngerboewdj mit kloppendje ciefers die gemeinlik handj in handj gaon mit passendje sjtatistiek. Zoeë zeen de congresgengers d'r van verzekerdj det ze get kinne mit waat ze zich aanhuuëre en daomit thoes óngerboewdj ane sjlaag of wiejer kinne.

Wie ich mich weer trök in eige landj de presentaties in ós parlement aanhuuërdje, mós ich weer aan 't net bezóchdje congres dinke. Wie ich kamerleje huuërdje blaere euver zake die ze klaorbliekelik örges opgevange höbbe of nog erger, van 'n meldjpuntj höbbe geplöktj, woor mien ieëste gedachte det ze mit zónne ónzin op 'n bietje congres neet weg zówwe kómme.

Noe moogs se natuurlik neet verwachte det alles waat door politici georakeldj wurtj, peer-reviewed mót zeen. Det zów 'n kamerlidmaatsjap ónmeugelik make. M'n zów aevel waal moge verwachte det waat nao boete gebrachtj wurtj op zien mins gebaseerdj is op óngerboewdje feite en neet door waat örges op 'n facebookechtig meldjpuntj is gedroptj. Es 'ne fractieveurzitter zich luuëtj óntvalle det asielzeukers dizze kantj op kómme óm borste, ougleje of gebitte te laote corrigere, zów hae toch baeter mótte wete. 't Insigste waat hae daomit óngerboewdj, is 'n greujendj geveul van ónbehage. Óngerboewe is örges 'n fundament ónger ligke en inne politiek zów det ónger vertroewe mótte zeen. Neet óngerboewdje oetsjpräök haole fundamente óngeroet. "Bezeuk nog 'ns 'n ech congres", dink ich den.

© jan sjure, 16 oktoeëber 2015