trök nao: "columns"

kölse

Daantje Dingenzoeker en de sinaasappelboot, de titel van 'n kinjerbook det ich oeëts koch wie mien ieëste kleinkindj ós mit zien aanwezigheid koom verblieje. Daan woor ziene naam en dus woor 't neet hieël verwónjerlik det ich 't beukske es apegruuëtsje opa neet inne bokewinkel kós laote ligke. D'r vèltj weinig oet veur te laeze, teks is wied te zeuke. 't Haet zien geldj aevel al döbbel en diek trökverdeendj. Neet allein mit Daan, ouch de volgendje gaondjeweg opgreujendje boeksebäömkes genete d'r zichbaar van.

De foto's vol mekkelik herkinbaar sjpulkes, prulkes en sjpeelgoodbieëskes en 'ne gruuëtsje groeëtvader dae d'r zien ieëste lesse in Limburgs wäördjes in kwiet kin, gaeve oerelank kiek- en loesterplezeer. Nog neet zoeë lang geleje sjtóng oppe facebookpagina van L1 de sjtèlling: 'Dialec haet gèn functie: laot 't mer oetsjterve.' Ónger de kop 'Taalkabaal', leet hooëglieëraar Taalcultuur Leonie Cornips d'r hie vanne waek häör gedachte euver gaon. Mit 'n kleinkindj oppe sjoeët en de aopegesjlage Daantjes Dingenzoeker tösse ós in, heel ich mich veur det, es 't oeëts mit 't Limburgs aafgeloupe zów zeen, 't neet aan mich zów ligke.

"Wo is Daantje? Wo is de laepel? Wo is de fiets?" Sjteeds weer opnuuj ging 'n piepklein vingerke nao 'n passendj plaetje. "Wo is 't aendje?" 't Vingerke bleef hange en 'n paar vraogendje uigskes lete nieks te raoje euver. Mien door en door Limburgse sjoeëndochter die zich 't sjpeel bekeek, sjoot te hulp. "Wo is 't eendje?" 't Vingerke sjoof sjnel nao wo 't zich bie 'aendje' gènne raod wis. Dao zoot ich mit mien good fatsoen. Wie v'r get later bie mien moder van 96 oppe kóffie ginge en ich häör 't eigeste mupke 'n duuëske 'knikkers' huuërdje gaeve, veel ich van mien geluif.

© jan sjure, 23 oktoeëber 2015