trök nao: "columns"

veurräödje

Jaore geleje koom ich veur mien werk nogal 'ns in Sjotlandj. 't Is mit vanne sjónste lenjer in Europa die ich kin. Ich höb d'r neet allein vanne natuur genaote, ouch aan anger typische gebroeke van 't landj móch ich preuve. Wie ich d'r oeëts gènne cultuurbarbaar, mer veural neet ónbelaefdj wól zeen, höb ich d'r taegezins de nationale 'haggis' gegaete. Sjaopemaag gevuldj mit sjtökskes lóng, hert en laever die bie ein gehaoje waere door 'n pepke van vèt van neerkes en havermout. Gelökkig volgdje die ervaring op 'n bezeuk aan 'n whiskysjtaokerie wo ich waal mit zin hej zitte preuve. Zónger det opwermerke hej ich de haggis waarsjienlik neet nao binne gekrege.

Aan de haggis bön ich noeëts mieër begósj, de whisky aevel gaajdje mich waal. De fles Old Fettercairn die ich inne sjtaokerie koch, woor de ieëste van 'n veuurräödje single malt whisky's det 'n dominant plekske in mien woonkamer innumtj. Ich weit neet of 't kumtj ómdet ich d'r mit ingewiedj bön, mer ich vinj 'm nog steeds mit vanne bèste oet mien verzameling. 't Is den ouch de insigste döbbele tösse mien negetieën flesse. Gruuëtsj sjöd ich d'r mich gaer 'ns eine in, 't leefs natuurlik mit 'ne bezeukendje leefhöbber.

De blinje 83-jäörige Italiaan Valentino Zagatti, zów zien sjouwers ophaole bie mien veurräödje. Hae hej 'n unieke collectie van mer leefs 3013 single malts inne woonkamer sjtaon. Mit 65.000 euro is 'ne Campbeltown dae in december 1919 gedistilleerdj wórt, de duurste oet zien veurräödje wovan nog neet ein fles aope is gewaes. De collectie is ónlangs veur miljoene verkochtj en binnekort te bezichtige in 'n sjpeciaal daoveur te boewe museum in ós eige Sasseheim. Preuve zal d'r neet kinne, d'r de ouge te moge sjtrele aevel 't aafreize waerd.

© jan sjure, 13 november 2015