trök nao: "columns"

toekoms

Zów ich es godbleef zoeë aod es mien moder moge waere, den höb ich nog minstens 'n dieke dertig jaor te gaon. Móch ich aevel ónverhöds mien vader naogaon, den mót ich d'r euver vief jaor van tösse. Die lienkes doortrèkkendj, kinne mien kinjer dao nog 'ns dertig jaor bietèlle. Mit alles waat zich de kómmendje jaore aan medische nujigheje geit aandene, zów dao zoeëmer nog 't eint en anger bie kinne kómme. Veur mien kleinkinjer is de drab vanne kómmendje kóffie zoeë diek det sjpeculere euver de lingdje van häöre toekoms weinig zin haet.

Kiekendj nao waat inne lèste jaore zoeë al is verangerdj, is 't geweldig óm 't allemaol te kinne mitmake. De ieëste vieërtig jaor van mien laeve mós ich zónger computer zeen door te kómme. Noe is 't bekans neet mieër veur te sjtèlle det ich zónger wiejer zów mótte. Ich rie al jaore zónger landjkaart inne auto en kóm op idder godvergaete plekske det zich mer luuëtj aanrieje. Mit 'n eigeste apparaatje oppe fiets kóm ich, zoeëgaar zónger meug te waere, nog wiejer. Wie ich lès 'n programma zoog euver zelfriejendje auto's, zoog ich mich druimentaere al zitte en haopdje 't nog te moge belaeve. De toekoms liektj ónbegrensj, mien grenske kumtj idderen daag doonderbie.

Alles waat v'r ós mer kinne veursjtèlle liektj meugelik. 't Is zoeë gek neet te bedinke of 't sjtuit euver 'n paar jaor veur de deur. Dis waek höb ich mich döks aafgevraogdj waat d'r toch loos is inne werreld. Get kalasjnikovs in Paries, oetgevónje wie ich nog neet gebaore woor, deje mien druimerieje ómkiepe. In waat veur 'ne werreld laeve v'r in godshieëresnaam? Ich maakdje mich neet ech zörg euver mien eige toekoms mer mieër euver die van mien kinjer en kleinkinjer.

© jan sjure, 20 november 2015