trök nao: "columns"

sjweitberg

Es pensionado kin ich 't mich leiste óm 't boeëdsjappe doon op zaoterdig te mieje. Aafgeloupe zaoterdig koom ich d'r aevel 'ns neet naeve en sjtóng mit 'n halfvol ker aan 'ne kassa dae neet ech opsjoot. Achter mich 'n echpaar det zich mit 'n nog voller ker dudelik huuërbaar sjtuuërdje aan twieë neet gebroekdje kassa's. "Det ze mer get van die asielzeukers achter die laeg kassa's duje", huuërdje ich 'm knotere. "Det ligktj de godganselike daag oppe voel klitse en mit dae scanner euver dae kraom hie gaon, is iddere aap te lieëre".

Ich wis neet waat ich huuërdje en zoeë te zeen hej de kassajuffrouw 't gaar neet gehuuërdj. Mesjien woor 't ouch waal es of. Es ich neet op zich mins twieë keer in dae man gepasj zów höbbe, hej ich 'm d'r op aangesjpraoke. Mer neet allein zien vleiselik euverwich, ouch zien getatoeëerdje erm die dreigendj gekruutsj op ziene boek hónge, deje mich wieselik besjloete miene móndj te haoje. Verboewereerdj, euverdónderdj, mer veural pienlik zjwiegendj booj ich mien boeëdsjappe aan.

Zónjigmiddig zoot ich in 'n klein gezellig theatertje in Zitterd. Mit 'Zjaer is wir teruk' leet Zjaer Bataille zeen det d'r neet allein trök woor, mer nog mieër det hae neet klein te kriege is. Trök oppe bühne en trök in Sjweitberg, 't leeflik dörpke det oeëts 'ns werreldberoemdj wórt in ziene radiocolumn 't verdreet van Limburg'. "Hadimassa, zaet 't maedje ane kassa". 't Woor ein vanne äöpeningszinne oet de prachtige veursjtèlling die mich óngewildj van Sjweitberg trök brach nao de winkel van zaoterdig. Neet väöl later vroog Zjaer zich, mer veural ós aaf wo v'r gaon wone es Wilders minister-president is. 'n Gooj vraog en ich bedach mich det v'r den mesjien nog altied in Sjweitberg ós boeëdsjappe kinne doon.

© jan sjure, 4 december 2015