trök nao: "columns"

puris(t)

Volges de dieke van Dale is 'ne puris (in 't Nederlands 'ne purist) 'ne aanhenger van 't purisme. En es se det weer op geis zeuke vinjs se det det 't sjtreve is óm de taal te zuvere van vraemdje wäörd en oetdrökkinge. Taalpuriste vinjs se euveral wo 't mer tale guftj. Veural in Frankriek en Duitslandj zeen ze erg actief. En waat te dinke van 't Afrikaans. Doe zóts bekans jaloers waere es se zuus wie ze dao wäörd oetvinje veur wäörd die v'r hie klakkeloeës euvernumme oet 't Ingels. Dao höbbe ze gèn 'rappers' mer 'rymkletsers', 'ne computer is dao 'ne 'rekenaar' en van 'ne een laptop höbbe ze haos geniaal 'ne 'skootrekenaar' gemaaktj.

Veur waat 't Limburgs betruft, laot ich mich ouch gaer in 't heukske vanne puriste duje. Ich sjtuur lever e-pos den e-mail en 'n kèlle moeremoos vinj ich nog altied lekkerder es 'n pan wortelsjtamppot. Purisme geit aevel wiejer es nuuj wäörd verzinne of aoj wäörd taege baeter wete in probere vas te haoje. Zoeë sjtuuërtj 'ne echte Nederlandse puris zich aan 'groter dan' en 'hun hebben' en duit 't mich pien ane uig of inne oeëre es ich laes of huuër det v'r 't ein of anger 'fieëst' höbbe in plaats van 'n 'fieës'. Die 't' huuërtj zich neet in mien Limburgs.

Zoeë loos ich gister inne gezèt 'n artikel euver 'de lus(t) van Linne', op mien entreekaertje aangekondigdj es 'de lus(t) van Lin'. In 't gezèts Nederlands hieëlemaol good, in mien Lins Limburgs is d'r door 't wegvalle vanne 't' gèn versjil tösse lus en lus, tösse lusse en luste. Vanaovendj laot ich aevel de laste van mien purisme aeve valle en mien zinne en luste prikkele op 't fieës van ós ieëste Linner revue.

© jan sjure, 11 december 2015