trök nao: "columns"

purisme

Vurrige waek sjreef ich hie euver de laste van mien purisme. De ink vanne gezèt woor nog neet druuëg of ik kreeg get pingelkes van mien mobieltje die aangove det ich nuje e-pos hej. 't Eint nao 't anger en 't ging mer door. 'n Deil ging euver waat ich sjreef euver 't weglaote vanne 't' in 'fieës' en 'lus' in waat ich 'mien Limburgs' nómt. In de meiste Limburgse dialecte wurtj de 't' neet oetgesjpraoke nao 'ne mitklinker oet 't kofschip. D'r zeen aevel plaatse wo die 't' zich waal degelik luuëtj huuëre. Hie zègke v'r 'fieëst' en 'bieëst' wórt mich van versjillendje kenj dudelik gemaaktj. Ich hej baeter mien 'Lins Limburgs' kinne sjrieve.

Hieël get mieër reacties kreeg ich ómdet ich sjreef det 'ne echte Nederlandse puris zich zów sjtuuëre aan 'groter dan'. Dao hooftj 'ne puris neet, laot dae zich mer aan 'groter als' sjaggernere. Dóm, dóm, dóm, mien fout.

Ouch kreeg ich get reacties op 't zuver haoje van tale zoeë wie beveurbeeldj de Pruse det zówwe doon. D'r woor d'r eine dae det neet zoeë'n good idee vónj. "Bewaar mich det we die nao mótte gaon doon mèt häöre Rechner, Tastatur, Schreiber, Festplatte en Datei", sjreef d'r. Ich haoj dao noe net waal weer van. 't Kin mich neet wied genóg gaon. 't Is toch vanne gekke det de Pruse kinne vlege vanaaf Flughafen Düsseldorf en veer det leider Gottes van Maastricht-Aachen Airport mótte doon. 'n Sjriefster wól de kómmendje waeke häör geleefdj Remunj óntvluchte ómdet ze de kersdaag neet in 'n 'Santa's Village' wól doorbringe. Vanne waek loos ich det se dao kins aansjuve aan 'n Aad-Remunjse Kerst Kwis Night. Es se 't neet al bös, zóws se toch baor puris waere es se zoeë get luuës.

© jan sjure, 18 december 2015