trök nao: "columns"

'n hieëske in 't kèlle

Greun erte, broen en wölle boeëne, linze of buuënkes oet d'n eigen haof en gaard, ze gaon 't hieëlemaol make dit jaor. Nieks en nemes minder es de 68ste Algemein Vergadering vanne Vereinigdje Naties haet 2016 oetgerope toet 't jaor vanne peulvruchte. Neet veur nieks euveriges, peulvruchte sjiene neet allein gezóndj en gooj vleisvervangers te zeen, ze zeen onnag 'ns duurzaam waat tele en verveure betruftj. Zoeëgaar 't milieu sjientj d'r baeter van te waere. Doonder bie hoes höbbe trendkiekers 2016 oetgerope es 't jaor van 't polderpositivisme. Ze zeen d'r heilig van euvertuugdj det 't ós allemaol good aaf zal gaon dit jaor.

D'r sjtuit ós weer 'n jaor van van alles te wachte. Hie 't jaor van 't book, van Jeroen Bosch en det vanne kievit, bie de Chineze det vanne aap. Paus Franciscus reep 2016 neet allein oet toet 't jaor vanne barmhertigheid, hae leet onnag 'ns wete det 't 'n heilig jaor geit waere. Noe v'r vanne zomer voetballendj nieks inne pap te reure höbbe, wórt 2016 oetgerope toet 't jaor van Dafne Schippers, Max Verstappe en Tom Dumoulin. Gister leet columnis Johan van de Beek wete sjtrank te höbbe det 2016 't jaor vanne serieus misversjtenj geit waere.

't Zal mich allemaol benuje en laot 't mer euver mich haer kómme. Ich maak mich vandaag mer 'ns 'n gooj sjtevige ertesop. Natuurlik mit 'n hieëske in 't kèlle. Neet allein ómdet erte gezóndj zówwe zeen of det 't mich gaajtj. Nae, veural ómdet kèlle en hieëske sjoeën aoj Limburgse wäörd zeen die zich bekans neet mieër laote huuëre. 't Jubilerendje 90-jäörige Veldeke Limburg haet 2016 oetgerope toet 't Jaor van de Limburgse Dialecte. Wie kins se det noe nog baeter viere es mit 'n hieëske in 't kèlle.

© jan sjure, 8 januari 2016