trök nao: "columns"

wanjele

Neet det ich noe drek mit zów gaon sjtörme, mer sjtèl det ich 't in 'n vläögske van aafnummendje zelfkinnis zów wille, den zów ich nao Vinlo gaon. Ich zów d'r neet haer gaon ómdet 't parcours d'r meugelike get mekkeliker is es det waat in Remunj oetgezatj geit waere. Sjterker nog, ich höb g'n idee wie en mit waat 't d'r allemaol oet geit zeen. Ieëgister sjtónge twieë sjtökskes inne gezèt euver de sjtormbane in Remunj en Vinlo, RoermondStormt en VenloStormt. 't Eint euver 'n hindernisrun in Remunj, 't angert euver 't numme van hindernisse in Vinlo.

't Bieëske hoof mer 'ne naam te höbbe. Aevel miene veurkeur geit oet nao 't numme in Vinlo baove 't runne in Remunj. Hieël verwunjerlik zeen die name neet es se zuus waem d'r achter sjtik. Wo de organisatie in Vinlo zich 'VenloStormt' numtj, wurtj 't rundje óm Sjtuf georganiseerdj door de 'Sjtichting Evenementen City Roermond'. De eigeste sjtichting die ouch al 'Santa's Village' nao Remunj haoldje. Ich loos det de objtakelrun mit 'ne hoeëge funfactor de retail gèn las wiltj bezörge. Wie anges geit 't in Vinlo allemaol, dao höbbe ze 't geweun euver doorzètte, euver 't verlègke van grenze en halfvol glazer, euver hindernisse veur äödjes die d'r mit häör rollators euverhaer moge.

In Remunj mót nog bepaoldj waere welke hindernisse genómme mótte gaon waere. 't Zal mich benuje waat 't Citymanagement veur name geit verzinne. Waat in september op 't Munstersquare of inne Chapellane kumtj te sjtaon of wie get mountains sand in de Lesserbrotherstreet genómme mótte gaon waere. Ich laot 't gaer aan mich veurbie gaon. Wie gezagdj, es ich al mit zów doon, woor 't in Vinlo. Veurluipig haoj ich 't bie wanjele. Zoeëgaar Nordic walking is nieks veur mich.

© jan sjure, 15 januari 2016