trök nao: "columns"

Nederlands lieëre

Ich kóm 'óm' kwart op twelf en neet 'euver' kwart op twelf. Ich kóm 'euver' 'n keteerke en neet 'óm' 'n keteerke. Wiezoeë is 't verkleinwaord van 't Nederlandse 'vat': 'vatje', van 'plof': 'plofje', van 'das': 'dasje', van 'lach': 'lachje' en det van 'klomp': klompje'? En wiezoeë det van 'veer': 'veertje', van 'leeuw': 'leeuwtje' of det van 'smoel': 'smoeltje'? Zoeëgaar hieëlemaol bóntj maaktj 't Nederlands 't door van 'ne kleine 'kom', 'n 'kommetje' te make.

Zoeëmer get veurbeeldje van wo ich de lèste maondje mit van doon höb. 't Versjil tösse 'óm' en 'euver' bie 't aangaeve van tieje, is 'n kwestie van dök oefene. Bie de verkleinwäörd zóws se nog mit 't kofscheep oppe próppe kinne kómme, aevel bie 'ne vluchteling dae 'n paar wäördjes Ingels sjpriktj, kums se dao neet ieëwigs wied mit. Geweun väöl oefene dus. G'r mèrktj 't, ich bön 'n paar maondj geleje bie Vluchtelingewerk Limburg begósj es taalcoach. Wiezieër ich mich de leste jaore ouch höb verdeeptj in 't Limburgs, 't guf zich amper get waat mieër voldoning guf es twieë uurkes Nederlandse taalbegeleiding.

Op 1 januari 2016 hej de Maasgouw 23.755 inwoners. Oppe eigeste Maasgouw waere dit jaor 56 vluchtelinge gehoesvesj taege 41 vurrig jaor. Koum 'n kwart procentje, wo höbbe v'r 't in godshieëresnaam euver. Mer los daovan, d'r is (en neet allein oppe Maasgouw) dringendj behoefte aan vriewilligers die 'n paar uurkes per waek voldoning wille uigste. Neet allein es taalcoach, ouch beveurbeeldj es maatsjappelik begeleider kintj g'r uch aanmelje bie 't Vluchtelingewerk Nederlandj. G'r gaotj d'r gènne sjpiet van kriege. Wie ich ieëgister nao twieë uurkes Nederlands oefene heives ging, goof ich 'n handj mit: "tot 'over' een week, weer 'om' tien uur". 'ne Glimlach sjprook bookdeile.

© jan sjure, 22 januari 2016