trök nao: "columns"

oppe kop aaf

Ich móch dis daag de laeftied haole dae oeëts nog 'ns aod genóg woor óm van Drees te kinne gaon trèkke. Wie ich sjmörges ónger koom, sjtónge oppe kop aaf 65 glaze pötjes mit dao-in aeveväöl gekluuërdje kaeskes op mich te wachte. 'Happy Birthday' leet zich herhaolendj laeze, op idder glaeske ein letterke. Ómdet de Ingelse variant van waat hie ómsjreve wurtj es 'ne sjoeëne verjäördig oppe kop aaf 13 letters tèltj en ómdet det oppe kop aaf 5 keer nuuëdig is óm aan 65 te kómme, hej de bedinkster van 't leechsjpektaekelke zich oppe kop aaf 5 setjes mótte aansjaffe.

Ich mós drie keer aomhaole veur ich ze alle 65 hej oetgeblaoze. 'n Klein bietje van de 3dje sjtoeët aom woor nuuëdig óm 't leech oet de lèste 5 te haole. D'r veur 't gemaak van oetgaondj det ich ouch den nog tied van laeve höb en det mien lónge toet daen tied blieve doon waat ze noe doon, bedach ich mich det ich op mien 90ste oppe kop aaf aan 3 sjtuuët aom genóg zal höbbe.

Mien cieferfiemelke leet mich neet los en al gaw hej ich oetgeraekendj det ich daen daag 23.772 daag oppe werreld vertoefdje. Neet ech 'n aantal wo se 'n fieëske ómhaer zóws kinne boewe. Dao mótte d'r nog 1228 bie óm op 'n sjoeën róndj getal oet te kómme. 25.000 daag, ich noom mich veur 't oetgebrèdj te gaon viere. Maondig 21 oktoeëber 2019 is 't oppe kop aaf zoeë wied. Nao wie ich mich höb laote vertèlle, bön ich róndj 6 oer sjmörges gebaore. Ich gaon d'r mich de wèkker veur zètte. Of mich ouch den emes oppe kop aaf 't benuuëdigdje aantal kaeskes aan zal gaon sjtaeke, waog ich aevel zjwaor te betwiefele.

© jan sjure, 5 februari 2016