trök nao: "columns"

bagger

Halverwaege d'n optoch goof ein vanne deilnummers get sjtóf veur discussie. "Waat 'n baggerwaer!", woor zien äöpeningszin. Hae hej zich net aan 'n sjtevig buujke tegooj gedaon en mós zien ei aeve kwiet. Ich goof 'm mit de baggerieërs ouch 'ne vrieje vastelaoveszunjig te gunne. Ónger 'n veurzichtig doorkómmendj zunke wórt 't 'm gaondjeweg dudelik det 't toch ech gènne bagger woor gewaes dae Pluvius 'm hej bezörgdj en baggerdje ziene optoch wiejer.

Bagger, waat 'n heerlik waord. Volges d'n Dieke is 't sjliek of módder dae van ónger water wurtj opgehaoldj. Ouch zóws se volges daen eigeste Dieke bagger kinne sjiete. 't Zów zoeëgaar in zeve kluuëre door de boeks kinne gaon es 't dich 'ns hieël diek ane prie geit. In Lin is mich door de jaore haer get aafgebaggerdj. Oeëts drejdje de baggermeules d'r euveroere, ze wore get jaore weg mer vandaag d'n daag baggertj 't ós weer 'n leef lus. D'r wurtj aevel neet nao bagger mer veural nao grindj gebaggerdj.

Gister leet zich laeze det neet allein de baggerendje optochluiper van zunjig las hej vanne bagger. Ouch ós Limburgse politici weite waat 't is óm ummere verbale bagger euver zich haer gesjtortj te kriege. 't Baggere sjientj d'r allemaol bie te huuëre allewiel. De grenze vanne vrieheid óm te kinne zègke, mer veural óm anoniem te moge sjrieve waat mer in dich opkumtj, lieke mit d'n daag verlagdj te waere. D'n ummer bagger van Minister Asscher van Sociaal Zake leep dis daag euver. Hae rooj zien reaguurders d'n asociale bagger ieës 'ns aan mam te laote laeze. Es die 't good vintj, moog op 't knuupke versjture geduujdj waere. Bliekbaar haet Pluvius det knuupke ouch óntdèktj. Es v'r de verwachtinge moge gluive, wach ós weer 'n waekske baggerwaer.

© jan sjure, 12 februari 2016