trök nao: "columns"

pruse rögke

Zoeë hieël aaf en toe sjpele dich vraoge door de kop wovan se dich aafvruuëgs wiezoeë ze überhaupt nao baove kómme. Sjterker naog, 't zeen van die vraoge wovan se dich aaf kins vraoge waat se mit 'n meugelik antjwaord mós. 't Kinne aevel vraoge zeen die dich neet loslaote. 'ne Tied geleje sjreef ich d'r hie al 'ns euver wie ich mich aafvroog waat in godshieëresnaam de functie woor van de merkskes links en rechs op 'n paar zök die ich mich hej.gekoch. Toet op d'n daag van vandaag bön d'r nog neet oet.

Vanne waek zoot ich weer mit zoeë'n vraog. Ich hej al jaore nieks aan miene bokekas gedaon. Wie ich 'm veur 't ieës gevuldj hej, sjtóng alles netjes bie-ein. Limburgs bie Limburgs, evolutie bie evolutie, medisch bie medisch, literatuur bie literatuur en zoeë wiejer. Es d'r aevel 'ns 'n nuuj book biekoom, mós 'n anger d'r oet. 't Liektj mekkelik mer es d'r 'ns 'n nuuj Limburgs book in mós, woor 't neet vanzelfsjpraekendj det d'r 'n Limburgs oet ging. Gaondjewaeges wórt 't eine óngerein.

Wie ich 't weer allemaol op 'n rieke hej, veel mich ein dink op. Bekans alle rögke lete zich netjes van baove nao ónger laeze. Bekans alle, want veur de Pruse beuk mós miene nak ómmesang. En dao woor inins zoeë'n alleseuverheersendje vraog. Ich höb mich get aafgegoogeldj mer kós gèn antjwaord vinje. Waat haet de Pruse bezeeldj óm taegedräöjse beuk te drökke? 't Is neet logisch en wied van gründlich. Es ich 'n Nederlands of 'n Ingels book op taofel lègk, is de rök mekkelik te laeze. Bie 'n Pruus book sjtuit de rök oppe kop. Mismeujig zeuk ich nog nao 'n verklaoring Waem hulptj mich wiejer veurdet ich gans doordrej?

© jan sjure, 19 februari 2016