trök nao: "columns"

minder, minder, minder

Of v'r noe wólle of neet, v'r kóste d'r van gèns kenj ómhaer vanne waek. Of d'r nieks belangriekers woor oppe werreld, wórte v'r van links, van rechs, van veur en van achter doeëdgegoeëdj mit alles waat ouch mer in de wiedste wiedje van doon hej mit de veurverkezinge in 'n paar Amerikaanse provincies. Wo geit 't in godshieëresnaam euver? Óm 't allemaol 'n bietje dudelik te kriege, bön ich 't mich 'ns op 'n rieke gaon zètte en 't mich 'ns bekeke es of v'r hie zoeëget zówwe höbbe.

V'r zówwe den per provincie kinne gaon sjtumme waem de kómmendje liestrèkker zów mótte gaon waere van de partieje wo v'r volgendj jaor mieërt eventueel op zówwe kinne gaon sjtumme. Neet in idder provincie wone aeveväöl luuj, dus neet iddere oetsjlaag tèltj aeve zjwaor. In Zuud-Hollandj wone diek nege keer zoeëväöl luuj es in Zieëlandj of Flevolandj of diek drie keer zoeëväöl es hie bie ós. Es ich die van Noord-Hollandj bie de Zuud-Hollenjers optèl, haet Nederlandj veur iddere Limburger vief komma zeve Hollenjer. 't Zów mich 'n gesjtraevel, gepuntjkomma en geraeken waere en veural belachelike campagnes die ós gaondjewaeges de sjträöt oet zówwe kómme. De media zówwe sjnel aafhäöke bie d'n ónzin.

Noe 't sjpeul aevel in Amerika oppe wage is, lieke v'r d'r gèn genóg van te kriege. Es hysterisch Amerika mit vlegskes en plekkerkes verklèdj aan 'n nationaal orgasme wèrktj, wille v'r d'r hie alles van wete. Ich höb 't tèlle opgegaeve wie dök ich geblondeerdje idiotie höb huuëre vraoge waem d'r veur 'n moer ane grens mot gaon betale. D'r zal ouch hie waal 'n mert veur zeen dink ich den. Es ich d'r aevel euver naodink, blief mer ein gedachte euver.

Kin 't get minder, minder, minder estebleef.

© jan sjure, 4 mieërt 2016