trök nao: "columns"

sjtreektaal

Ein vanne leukste sjtökskes in dees gezèt vinj ich 'vis-à-vis'. De ein waek sjrief Guus Urlings 'ne breef aan Ray Simoen, de anger waek reageertj Ray dao-op en zoeë blieve ze zich óngerein aafwissele. Ze zeen d'r aeve van tösse gewaes mer twieë waeke geleje höbbe ze häöre vis-à-vis weer opgepak. In ziene ieëste breef kós ich Guus weer trök. "Nou, daar ben ik weer", begós hae en pakdje de koe sjtevig bie de häöres door euver 't European Charter for Regional or Minority Languages te beginne. Wie g'r wètj, haet 't Limburgs in 1997 de sjtatus van Europese regionaal taal gekrege en oppertied kumtj 't Charter 'ns langs óm te kieke of d'r waal genóg gedaon wurtj aan 't in sjtandj haoje en bevordere van die taal.

Dees runj woor ouch de gezèt genuuëdj óm oet de deuk te doon waat häör biedraag aan die insjtandjhaojing is. Guus kós 't neet väöl baeter samevatte es mit de móndj vol tenj te sjtaon. Op 'n paar dialeccolumns en, sjoeën samegevatj, get losse waordconfetti nao, wurtj de gezèt in 't Algemein Nederlands gevuldj. Hae vroog zich aaf of det neet anges mós en zoeë jao, wie en zoeë nae, woróm neet.

Ray woor gans dudelik: "laote v'r de gezèt veural in 't ABN haoje en ós neet in 'n mieneveldj van sjpellingdiscussies en begripsverwarringe sjtorte". 't Ieëste sjtepke wurtj binnekort gezatj es róndj Pinkstere de Limburger 'n nuuj gezich krieg. Waat allemaol geit verangere zal zich taege daen tied waal oetwieze. Ein dink sjtuit aevel al vas. Ray krieg wurtj waat betruf miene 'druimentaere' op zien winke bedeendj. Nog 'n waek of ach moog ich dit plekske vulle. Daonao zal 't hie op vriedigmörge neet mieër in, mer haopelik nog döks euver ós sjtreektaal gaon.

© jan sjure, 18 mieërt 2016