trök nao: "columns"

blended

Ich zoot in Sjotlandj vanne waek. De wanjelsjoon inne wage, 't fototoesjtèl opgelaje, 'n sjoeën route oetgesjtippeldj en al vreug inne mörge 'n sjtraolendje blauw lóch. Neet wied van wo v'r zote, loog nogal get óngerepdje natuur mit dao inne buurt, in 't dörpke Aberfeldy, de distilleerderie van Dewar. Twieë bekindje whisky's waere dao mit groeëte zorg geproduceerdj. De Dewar zelf is 'blended', waat neet mieër wiltj zègke es det 't 'n mingsel is van versjillendje saorte whisky's. De angere, 'ne 'single malt', is genumdj nao 't dörpke en van 't saort wo mien papille de veurkeur aan gaeve.

Ómdet 't waer in Sjotlandj nogal verangerlik kin zeen, wèts se noeëts of se noe waal of neet 'n sjtörmvaste paraplu mós mitnumme. Veur de zekerheid nog mer aeve 't Sjots nuuts opgezatj veur 't lèste waer. Get ieëste veurzichtige berichte oet Brussel gove ózzen daag 'n gans anger aanzeen. Oere later loge de wanjelsjoon nog ónbetraoje inne auto dae nog gènne yard gereje hej, woor nog gèn foto gemaaktj en de lóch nog aeveblauw es sjmörges vreug. Brussel heel ós oere in ós huuske gekluusterdj.

Op geweun sjoon lepe v'r sjmiddigs Aberfeldy binne. Waat 'n versjil mit de beeldje van sjmörges. Wie v'r 't hieël proces van whisky make oetgelagdj krege, sjtónge de wäörd euver häöre blended vanne Sjotse gids haos metaforisch loeëdrech op de veursjpelbaar reacties van Wilders en Trump die ich eder daen daag op internet taegekoom. 't Minge van versjillendje saorte woor in die klein distilleerderie toet kuns verheve. Wie ich ouch van mien single maltverzameling kin genete, inne aafsjloetendje preuverie in Aberfeldy móch ich versjillendje saorte blended preuve. Blended in plaats van blonded, 't is mer ein letterke, aevel 'ne werreld van versjil.

Ich bön Brussel, ich bön blended.

© jan sjure, 25 mieërt 2016