trök nao: "columns"

introvert

Mit 'n gerösj hert dörf ich mich 'taalpuris' te numme. Ich sjreef hie 'n gaod jaor geleje de volgendje teks: " 't Verkieërdj gebroek van betrèkkelike veurnaamwäördjes is get waat mich al lang opvèltj, aeve lang sjtuuërtj en det waarsjienlik mien laevelank blief doon. En det terwiel 't ougesjienlik zoeë mekkelik is: 't maedje 'det', de jóng 'dae', de köppelkes 'die' ". Ich weit neet of ich d'r vanaaf det ich 't sjreef mieër op bön gaon lette, mer 't liek ummer erger te waere. Op 't fieëske van de democratie woonsdig woor 't weer 'ns good pries. Ich höb 't neet biegehaoje, mer -'t kabinet 'die'-, höb ich zoeë dök veurbie huuëre kómme det ich aan mien eige taalgeveul begós te twiefele.

Mesjien nog waal mieër sjtuuër ich mich aan sjpelfoute. Typefuitjes vinj ich sjlordig, es ich aevel 'hij bedoeld' of 'hij heeft bedoelt' zeen sjtaon, kómme mien haor es bekans van allein ómhoeëg. Ich kóm neet zoeë ieëwigs döks op Facebook, mer es 't mich 'ns gebeurtj, zów ich aan 't verbaetere kinne blieve. Waat is det toch? Waat höbbe de luuj die zich dao aan sjtuuëre veur trèkskes?

Dis waek kreeg ich mien antjwaord in 'n artikel mit de pakkendje titel: "Are you a 'grammar Nazi'?" oet de Ingelse Daily Mail. 't Ging allemaol euver 'n óngerzeuk ane universiteit van Michigan wo-in gekeke is nao karaktereigesjappe van miense die zich ergere aan foute in grammatica en sjpelling. Luuj wie ich zègk mer die, volges de óngerzeukers, introverte trèkskes en 'n knorrig karakter ónger de leje höbbe. Noe sjtraevel ich mich oppertied 'ns gaer euver taal in 't algemein en Limburgs in 't biezónjer. Det zóws se 'knorrig' kinne numme, dao kin ich mit plezeer mit laeve. Mer 'n introvert trèkske?

© jan sjure, 8 april 2016