trök nao: "columns"

miene goje god

Zónger nao te dinke leet ich 't mich dis daag óntvalle: "miene goje God". Ich reej euver 'n paad det nörges oet leek te kómme en ummer sjmaler wòrt. Drejje woor neet ech meugelik en ich zoog de buuj al hange. Noe is achteroet rieje normaal gesjpraoke gèn probleem. Es se det aevel op 'n van God en idderein verlaote paedje in 't sjemerduuster mós doon, wurtj 't al get lestiger. Höbs se den onnag 'ns de achterbank zoeë godallemachtigs volgelaje det de achterroet allein vanne boetekantj te zeen is en beraegendje boetesjpegels neet ech zich gaeve, luuëts se waal 'ns get valle wie: "miene goje God". 't Koom d'r zoeëmer oet zónger d'r bie nao te dinke.

"Det klinktj waal hieël vraemdj oet de móndj van 'ne euvertuugdje atheïs", klónk 't vanne sjtool naeve mich. "Kump 't dich aeve ane prie, den vèls se al van dien geluif aaf". Noe kós det mich d'r neet van euvertuge det neet geluive ouch geluive is, mer 't woor waal 't begin van 'n aardige discussie op det godverlaote paedje. Vergaete woor veur aeve wie v'r hie godsamme verzeildj wore geraak. Waat ich ouch aandroog, mien "miene goje God" woor d'r neet mit te verklaore.

Es wie door 'n godsgesjenk reje v'r ós 'n paar hóngerd maeter wiejer op 'n godvergaete hèkske oet. 't Woor den waal gesjlaote mer 't goof de bekans godsónmeugelike ruumdje óm d'r nao godwètjwiedök veur- en achteroet de kóntj vanne auto taegenaan te zètte. Goddank zote v'r 'ne kilomaeter trögkes weer oppe 'n half oer eder verlaote waeg. "Zuus se waal, diene miene goje God haet gewèrktj", kreeg ich aeve later sjampendj mit. "Sjei d'r in godshieëresnaam euver oet", woor 't lèste det ich d'r nag euver kwiet wól.

© jan sjure, 15 april 2016