trök nao: "columns"

modertaal

Ieës 'n telefoontje, daonao 'ne breef. Ze vele 'm kaod op 't lief. Det bleef 't meis hange wie ich dinsdigmörge de waekelikse 'Modertaal' van miene gewaardeerdje collega dialeccolumnis Frits Criens hej gelaeze. Of baeter gezagdj, 'ne keer of drie gelaeze. Ich kós 't geveul. Ouch ich kreeg det telefoontje. Ouch ich hej dae breef gehadj. En ouch mich vele ze kaod op 't lief. Ouch mien waekelikse druimerieje zeen hie euver veer waeke neet mieër te vinje. Nao vandaag moog ich mien modertaal nog drie keer op papier zètte.

Door 't 90-jäörige Veldeke wórt 2016 oetgerope toet 't Jaor van de Limburgse Dialecte. 't Limburgs haet fieës. Same mit De Limburger geit de jubilerendje vereniging op zeuk nao 't sjónste Limburgse waord en de sjónste Limburgse oetdrökking. D'n eigeste Limburger wurtj 'geresjtyled', óm 'ns 'n sjoeën Limburgs waord te gebroeke. De gezèt mót 'doonder bie de luuj', óm 'ns 'n sjoeën Limburgse oetdrökking te gebroeke. Wie doonder kin det es inne taal die neet zoeëmer 'n erkindje Europese sjtreektaal is. Wie doonder kin det es inne taal die de meiste van ós zich gaer inne móndj numme. Wie doonder kin det es noe en den 'ns inne taal vanne Limburger. Wie doonder kin det es in ós Modertaal.

Ich gaon ze misse, de woonsdigaovendje wie ich nog wèrkdje, de dónderdigmörges nao mien pensioen. Die ein-twieë vaste uurkes achter miene computer die ich waekeliks nuuëdig hej óm óngevieer 300 Limburgse wäörd op papier te kriege. Bekans èlf jaor deej ich det mit väöl plezeer. Gister veur de 541ste keer. Aevel dees 300 wäord zeen gistermörge neet mit väöl plezeer mer mit pien in 't hert gesjreve. 't Jaor vanne Limburgse Dialecte, 't Limburgs haet fieës. Druimentaere zoog ich mich sjrieventaere aod waere in mien Modertaal.

© jan sjure, 22 april 2016