trök nao: "columns"

pötje

Nog drie te gaon. Mit die gedachte dook ich nog 'ns door waat ich door de jaore haer zoeë al gesjreve höb. Mien ieëste vieërtig columns sjreef ich neet in dees gezèt mer in ós Linner dörpsgezètje. Zoeë ouch 't volgendje sjtökske. Ich sjreef 't wie ich oeëts veur mien werk óngerwaeges woor en op 'n einzaam hotelkamer in San Diego zoot. Ich dach det 't noeëts raegendje dao in Southern California, 't woor aevel ech water det oet de lóch koom. Meh good, wie ich destieds vanoet mien hotelkamer nao boete keek, zoog ich det d'r oppe binneplaats euveral borde gezatj wórte mit de waarsjuwing det de vloer naat woor.

Wie ich later aan ein vanne tuinmen vroog woróm ze det deje, vertèldje hae mich det op die eigeste binneplaats nog neet zoeë lang geleje 'n vrouw nao 'n raegenbui woor oetgelitsj. Ze hej 't hotel aangeklaagdj en zich in gedachte al riek geraekendj aan 'ne böltj, twieë blauw plekke en get sjräömkes. Oppe hotelkamer zoot 'ne sticker oppe föhn det ich 'm neet naat mós make es ich 'm gebroekdje. Op 't kóffiemesjien eine det d'r heit water oetkumtj. Op kóffiebaekers det d'r get werms in kin zitte. Inne reclame veur de pil sjtuit in klein letterkes det die gèn besjerming guf taege aids of soa's.

't Wachte is oppe waarsjuwing det se van al det oetkieke knatsj knettergek, euversjpanne, aggresief of weit ich waat kins waere. Ich höb altied gedach det v'r 't bie ós bóntj maakdje mit ós euverdreve groeëte tekste op alles waat se mer kins rouke. Amerikane zeen hieëlemaol te gek veur wäörd. 'n Ech pötje make ze d'r van. Mer veur alle zekerheid waal eint mit de waarsjuwing d'r op det se d'r naeve kins pisse.

© jan sjure, 29 april 2016