trök nao: "columns"

meh toch

Ich haoj van ciefers. Dae fiemel höb ich al van kinjsbein aaf en neet ómdet ich, wie ich get grótter woor, 'evidence-based healthcare' ging sjtudere. Die sjtudie drejdje eigelik mer óm twieë dinger: 'n gooj vraog en 'n óngerboewdj antjwaord. In 'Modertaal' wórt aafgeloupe dinsdig 'n gooj vraog gesjtèldj: "Wie kumtj de hoofredactie aan die wiesheid?". Wiezoeë voldoon Modertaal en Druimentaere neet mieër en is die formule oetgewèrktj? Noe weit ich oet 'n bès betroewbaar brón det Ellie en Frits dao nogal get reacties op höbbe gehadj. Zelf kreeg ich d'r 43 in mien e-posböske. Neet drek get óm van óm te kiepe, meh toch.

'n Gooj daobie aansjloetendje vraog zów kinne zeen: "wo zitj 'ne doorsjnee laezer van 'n gezèt op te wachte?" Noe bön ich toevallig zónne laezer en kós mich die vraog zèlf stèlle. Mit waalgetèldj eine óngervraogdje neet ech 'n weitesjappelik óngerboewdje enquête, meh toch. Zoeë hoof veur mich 't sjportkatern neet. Gemeinlik geit 't óngelaeze bie 't aod papier. D'r zeen aevel genóg laezers die dao waal dieke pap van löste en dus kumtj de sjport terech oetgebrèdj aan bod.

Veur mien óngerzeukske pakdje ich mich de gezèt van aafgeloupe vriedig nog 'ns inne henj, die vanne daag wo-op ich jaorelank dit plekske moog vulle. Op bladzie B10 sjtóng 'n paginagroeëte advertentie veur 't book 'over LIMBURG'. 'n Selfie-advertentie zègk mer. Móch ich die ónverhödsj gemisj höbbe, rechsbaove op A14 euver 'n kwaart pagina, nog mer 'ns 'over LIMBURG'. En veur 't geval det ich ouch die neet gezeen zów höbbe, links oppe eigeste bladzie nog mer 'ns: 'over LIMBURG'. Dao zoot ich pas neet op te wachte. Aafgeloupe vriedig hej veur mich get minder 'over LIMBURG' en get mieër 'in LIMBURGs' gemoge. Noe bön ich waalgetèldj mer eine laezer, meh toch.

© jan sjure, 6 mei 2016