trök nao: "columns"

lexit

Griekelandj oet de eurozone: 'Grexit'. 't Hieël Brits eilandj oet de eurozone: 'Brexit'. 't Limburgs oet de Limburger: 'Lexit'. Toet en mit vandaag kós de Midde-Limburgse laezer twieë keer per waek 'n sjtökske Limburgs preuve. Vanaaf noe is 't euver. Lexit dus. 'ne Leefhöbber bedankdje mich ein dis daag en sjreef in foutloeës Limburgs det 't waekeliks bietje Limburgs inne gezèt häöm baovenal get sjoeëns haet naogelaote. Hae lieërdje neet allein mekkelik Limburgs laeze, hae is 't zoeëgaar gaon sjrieve.

Lexit dus. D'r zal hie of dao den nog waal 'ns 'n Limburgs waord inne gezèt kómme, mer 't zal geïsoleerdj tösse aanhaolingsteikes of cursief gedröktj gaon waere. Ganse Limburgse sjtökker teks aevel verdwiene oet de Limburger. De gezèt luuëtj zich daobie veurgaon door 't jubileumbook van Veldeke det ónlangs versjeen bie zien 90-jäörig jubileum. Gans in 't Nederlands. 't Bietje Limburgs is hie en dao cursief of op leechblauw papier gedröktj. D'n echte Limburger zal zien Limburgs aevel blieve gebroeke. Hae zingtj den waal "waar in het bronsgroen eikenhout" in ónvervalsj Nederlands, zoeëgaw 't lèste tuuënke verstómdj, is 't toch weer plat waat de klok sjluit.

Lexit dus. Aan alles kumtj 'n inj. Waat nog resj in miene lèste 'druimentaere' op dizze vriedig de dertieëndje, zeen get dankwäördjes veur bekans twelf jaor sjriefplezeer. Oppe ieëste plaats natuurlik nao de troewe laezer en alle reacties die ich door de jaore haer mit mien druimerieje höb moge losmake. Ze wore gemeinlik positief mer ouch de get kritische of zoeëgaar de negatieve neutjes höb ich ummertoe mit plezeer euver mich haer laote kómme. Wäördjes van dank ouch aan de redacties vanne regio-edities Remunj en Wieërt vanne Limburger die waekeliks dit plekske veur mich wiste vrie te make.

Lexit dus, adieje wah, 't geit uch good.  

© jan sjure, 13 mei 2016