trök nao: "columns"

vief veur twelf

Zaoterdig woor de 'Dei fan de Fryske taal', de daag vanne Friese taal, 'n initiatief van 't Fries Jeugparlement. "Het is 'fiif foar tolve' veur de Friese taal", loos ich zaoterdig inne Volkskrant. Vanne zomer presenteerdje 'ne Nijmeegse taalóngerzeuker oet Nijmege 'n sjtudie nao 't gebroek van 't Fries. 'Vief veur twelf' woor zien conclusie. Aojers kalle sjteeds mieër Nederlands mit häör kinjer. Gesjprekke vanne jeug óngerein laote 'n nog sjterker daling zeen. Ós twieëdje riekstaal sjtuit op oetsjterve.

Veur 't Limburgs is 't nog neet gans zoeë laat, ouch hie geit 't aevel hel op twelf oer aan. Ouch in ós Limburgs zitj de sjleet. 't Is mer 'n dröppelke op 'n gleujendje plaat mer vanaaf vandaag kintj g'r hie twieëwaekeliks 'n sjtökske ónvervalsj Limburgs laeze. Mit väöl plezeer gaon ich op dit plekske wiejer mit waat ich bekans twelf jaor inne Limburger móch doon.

Blood kruuptj wo 't neet gaon kin, luuëtj zich hienaeve laeze. Blood mót sjtruime. Es 't det neet mieër duit, zuutj 't d'r neet good oet. Veur 'n taal gultj 't zelfdje. Die mót gekaldj, gesjreve en gelaeze waere. Neet det 'druimentaere' de klok trök op èlf oer geit kriege, mer idder dröppelke hulp.

© jan sjure, 19 oktoeëber 2016