trök nao: "columns"

d'n èlfdje vanne èlfdje

Ich bön neet ech 'ne vastelaovesman. Ich bön d'r noeëts eine gewaes en zal d'r waarsjienlik noeëts eine waere. D'n èlfdje vanne èlfdje, ich kin d'r neet werm of kaod van waere. Óm èlf op èlf begós 't sjpektakel op 't Vriethaof en van waat ich d'r van gezeen höb, mótte d'r hieël get luuj al vreug oet de vaere zeen gewaes óm zich inne vaere te toeëje

Ouch ich woor vriedigmörge vreug op, óm 'n oer of veer vroog mien blaos of ich aeve kós helpe. Gemeinlik zèt ich nao zoeë'n nechtelik noeëdsjtöpke de radio aan dae vanzelf nao 'n uurke de geis guf. Ich wórt aangenaam verrasj door Suzanne, wiedeweg 't meis bekindje leedje van Leonard Cohen. 't Wórt door de nachzuster aafgekóndigdj mit 't dreuvige berich det Leonard neet mieër ónger ós woor. Óm half vief zoot ich mit 'n ieëste tas kóffie op internet nao mieër nuuts te zeuke.

't Koom neet ónverwach. Drie waeke geleje versjeen zien lèste CD die ich óngertösse gries gedrejdj höb. Leedjes die al lete huuëre det 't neet mieër lang zów doere. "G'r wiltj 't gaer get duusterder, v'r doon 't vuur oet", zingtj 'r mit 'n profetisch sjpraekendje sjtum. D'n èlfdje vanne èlfdje woor den waal 'n begin, veur mich sjloot d'r get aaf waat bekans vieftig jaor geleje begós wie ich mien ieëste LP koch. D'n èlfdje vanne èlfdje, veur mich zal d'r noeëts mieër 't zelfdje zeen.

© jan sjure, 16 november 2016