trök nao: "columns"

sjriene

Dis daag wórt in 'ne quiz gevraogdj nao 'ne aoje naam veur meubelmaker. Nog veurdet de kandidate 't antjwaord hejje ingevuldj, zoot 't al in miene kop: 'ne 'sjrienewèrker'. De quizleider koom aeve later mit de oplossing: 'schrijnwerker'. Wiewaal mien antjwaord get anges klónk, raekendje ich 't toch good. Oeteindelik woor 't 'ne Hollesje quiz en in ós Limburgs is 't noe einmaol gebroekelik óm van 'n 'ij' 'n 'ie' te make. De sjrienewèrker, waem kintj 'm nog, de man dae mit zien twieë henj 'n meubel kós make.

Ouch dis daag loos ich det v'r in Limburg aan die eigeste henj 'n sjrienendj tekort höbbe. Vieërtieënhóngerd óm precies te zeen. Neet óm sjriene te make, det gebeurtj machinaal allewiel. 't Sjrienendj tekort zoot 'm gans örges anges. Mer leefs zevehóngerd verpleegsters zeen d'r in Limburg nuuëdig óm te zörge det v'r ouch inne toekoms good verzörgdj aod kinne waere.

Sjriene, waat 'n vraemdj waord. Sjriene zeen van aodshaer keskes of doeëdskiste die allebei nieks van doon höbbe mit 't sjriene in sjrienendj. Dao verwiesj sjriene nao 't geveul det vreuger te werm gewasse gebreidje óngerboekse gove. Noe sjriene allein wunj nog. 't Sjriendje aevel wie ich loos det 't neet ech hieël lestig zów mótte zeen óm luuj sjnel op te leie en zoeë vieërtieënhóngerd óntbraekendje henj aan 't bèd aan te vulle. Zoeë kriege v'r aevel gèn sjrienendje wunj dich. Zoeë ligke v'r hoeëgoet get sjneller in de sjrien.

© jan sjure, 30 november 2016