trök nao: "columns"

nemes

Taal is ein vanne kinmèrke die ós anges laote zeen den alles waat mer bewaegtj op dizze werreld. 't Is get wo v'r nog mer weinig van wete. 'n Kindj van drie is 'n grammaticaal genie zónger oeëts get van 'n letter begrepe te höbbe. Gelieërdje braeke zich nog dageliks häör köp euver wie zoeëget in godshieëresnaam meugelik is. Zoeë noe en den aevel is taal zoeë klaor wie 'ne ganse zak sókkerkluntjes. Bekans wiskundig dudelik zègk mer.

D'r zeen wäörd die zeen zoeë zeker es ein en ein twieë is. Num 'ns wäörd wie 'altied', 'noeëts', 'idderein' en 'nemes'. Die laote net wie 'nieks', nieks aan dudelikheid euver. Es ich zègk: "det doon ich altied zoeë'', den bedoel ich neet: 'noe en den', 'aaf en toe' of 'gemeinlik', nae den bedoel ich: 'altied'. Dao is gèn plaats veur twiefel, dao is gèn misversjtandj meugelik. Net wie es det ich beveurbeeldj zów zègke: "de zón geit altied ónger" of "idderein geit doeëd".

Es ich zègk 'nemes', den bedoel ich 'nemes'. In 'ne videoboeëdsjap dae vurrige waek aan 't adres van 'n paar rechters woor gerichtj, mer aevegood volop in 't nuuts woor, koom det 'nemes' ouch nao baove. Ich huuërdje emes zègke: "Nemes vertroewtj uch mieër". Ómdet ouch ich door det 'nemes' oetgesjlaote wórt, veul ich mich gerope óm dae oetsjpraok te weerlègke. Ich geluif nog heilig in ós rechterlike mach en daomit kin dae videoboeëdsjap bie 't aod voel.

© jan sjure, 14 december 2016