trök nao: "columns"

ingels

Nao 'n gans jaor gevierdj te höbbe det ós dialecvereiniging Veldeke Limburg 90 jaor woor gewaore, hej ich mich aan 't begin van 't nuuj jaor veurgenómme det 't daomit neet euver woor. Ich zów mien Limburgs in ieëre blieve haoje. Te beginne mit 't Ingels. Zoeë min meugelik Ingelse wäörd. En neet allein in mien Limburgs, ouch in mien Nederlands gaon ich mindere. Mer 't jaor woor nog neet tegooj ingeknaldj of ich kós gèn genóg kriege van ein Ingels waord. 'Onehundredandeighty', wie dökker ich 't huuërdje, wie sjónder 't klónk.

D'r zeen luuj die vinje 't gèn sjport. En al hieëlemaol gèn olympische. Es ich aevel zeen mit waat veur 'n precisie drie pielkes in det ozelig klein hökske gegoeëdj waere, kin ich 't dao neet mit ins zeen. 'Onehundredandeighty', doot 't mer ins. Waal oppe Olympische Sjpele handjbaog-, pistool-, gewaer- of weit ich neet waat veur sjete. Op veljer die God wètj wieväöl grótter zeen es det 'triple-twintjighökske. D'r moog onnag 'ns door 'n vizier op gerich waere. Van mich moog darte olympisch waere. Van Gerwe in 't oranje nao goud. Onehundredandeighty, mien Ingels waord van 't jaor.

Zoeëväöl sjónder toch es 't 'once in a lifetime' wo de vrouw vanne nuje Uleprins maondig de gezèt mit haoldje. Of 't 'shit man' wo d'n eigeste prins d'r nog 'n sjöpke baovenop mit deej. Waat woor 't neet sjoeën gewaes es dao in doeëdgeweun Remunjs 'k'rdju kaerel' hej gesjtange.

 

© jan sjure, 11 januari 2017