trök nao: "columns"

das nie wieder...

Zónger te euverdrieve, dink ich det ich 'm 'ne keer of vief höb gehuuërdj. D'n ieëste keer zoeë óngevieër op 't eigeste moment det hae 'm oppe trappe van 't Capitool sjtóng te orere, saoves en de daag d'r op kome die haol wäörd alineagewies nog 'ns regelmaotig euver de bühne. Zaoterdigmörge sjtónge de gezètte d'r vol van. Alle commentare euverzeendj, kin ich allein mer concludere det hae genadeloeës óngeroet gesjoefeldj wórt.

En terech, de blaoskaak woor neet óm aan te huuëre. Van alles waat ich d'r van zoog en loos, is ein dink blieve hange. De column van Paul van der Steen zaoterdigmörge inne Limburger. Hae vergeleek de oetgebraldje zeiver mit dae vanne reclamesjpotjes van Tel Sell en vónj 't jaomer det 't neet naogesynchroniseerdj woor. Tommy Teleshopping es inauguratiepräötje van emes dae, wie se 't ouch bekieks, de kómmendje jaore ein vanne belangriekste miense oppe werreld geit zeen.

Wie ich nao dae zeiverieër zoot te loestere, koom Tommy Teleshoping neet bie mich op. Ich dach aan ós bure wo ze waal aan naosynchronisatie doon. Wie mót det dao geklónke höbbe? Haopelik höbbe ze d'r 'n ónbetuuëndj sjtumke ónger gezatj. Anges mótte ze d'r dao toch haer geloesterdj höbbe mit 'n 'das-nie-wiedergeveul' wo de huunj gèn broeëd van löste. Zaoterdig huuërdje ich in Koblenz ózze eige blónje populistische blaoskaak waal op zich Duits orere. 't Klink den toch allemaol net get anges. Zoeëgaar hie kreeg ich dao 'n 'das-nie-wiedergeveul' van.

© jan sjure, 25 januari 2017