trök nao: "columns"

landjkaart

Waat loge v'r d'r sjoeën bie oppe 'Nieuwe Kaart van het Koningrijk der Nederlanden en het Groothertogdom Luxemburg' oet 1816 womit v'r maondig ózze mörge móchte beginne. Bladziegroeët inne gezèt, nieks Limburg es appendix van Nederlandj. In zaoch rose loge v'r destieds ingenèsteldj tösse de provincies Noord- en Zuud Braobandj (doe nog mit 'n 'd'), Antwerpe en Luuk. Ich haoj van landjkaarte, veural van die die ós get euver ós verleje vertèlle. Dit woor d'r weer 'ns zoeë ein. Ein óm in te lieste. Waat is d'r in die twieëhóngerd jaor neet allemaol verangerdj.

Waat zów ich 'ns gaer 'n kaart inne henj höbbe van 2216. Zów Belsj nog ein landj zeen? Zów half Nederlandj ónger water ligke? Zówwe v'r zoeëmer 'n sjtäötje vanne Vereinigdje Sjtaote van Europa zeen? Vraoge die 'n kaart zów kinne beantjwaorde die net zoeë wied veuroet kiektj es de kaart van maondigmörge trögkes keek. Gèn miens dae noe laeftj zal dao inne wiedste wiedje ouch mer 'n antjwaord op kinne gaeve.

De kaart oet 1816 woor 't gevolg vanne bepaolinge van 'n cóngres in Wene en 'n vredestractaat oet Paries. De mentaliteit van 'd'r aan wie Blücher' hej ós van Napoleon verlosj. Liters blood wore nuuëdig óm die kaart vorm te gaeve. Wie ich mich die kaart maondigmörge bekeek, vroog ich mich druimentaere aaf wie ós naozate in 2216 nao 'n kaart van noe zówwe kieke. Zówwe dao ouch liters blood veur nuuëdig zeen gewaes?

© jan sjure, 8 februari 2017