trök nao: "columns"

sjtum

Es se van politiek hèls, is 't normaal gesjpraoke ómme veer jaor 'ne behuuërlike puzzel óm nieks te misse. De gezètte zeen d'r vol van, radio en televisie zeen allemaol neet bie te haoje en zoeëgaar mit oetzending gemisj wurtj nog hieël get gemisj waat wurtj oetgezònje. V'r moge volgendje waek weer gaon sjtumme, ós sjtum 'ns laote huuëre.

Ich kreeg vurrige waek de lies toegesjik mit kandidate die d'r van druime de kómmendje veer jaor in 'n blauw sjteulke te kinne zitte. Neet zoeëmer 'n lies; mer leefs 23 partieje, mer leefs 854 Nederlenjers die zich waal op 'n blauw sjteulke zeen zitte. Veur 704 daovan zal gèn plaetske besjikbaar zeen. Net wie veur nogal get van die 23 sjtruiminge. Dao gaon ós gezamelike sjtumme 'n sjtekske veur sjtaeke. Det puzele v'r ós zelf waal oet.

In tieje van verkezinge wurtj väöl belaofdj. Door d'n eine nog mieër es door d'n angere. Mer in ein boeëdsjap zeen ze 't allemaol mit ein ins. 't Is mer ein wäördje: 'sjtum'. 't Maak neet oet op waem, mer sjtum. In 't leedje 'de sjtum' luuëtj Laur Rutten huuëre waat v'r neet allemaol mit ós sjtum kinne doon: kalle, zjwiege, lache, bäöke, zinge, lege, sjrieëve, fluustere, beminne, vraegele, regere en euverwinne. Volgendje waek goonsdig kriege v'r de kans óm 't belangriekste te doon waat v'r daen daag mit ós sjtum kinne doon. Ze laote huuëre. Zónger ouch mer 'n waord te zègke.

© jan sjure, 8 mieërt 2017