trök nao: "columns"

insjpiratie

Maondig hej de veurpagina van ós gezèt 'n sjoeën äöpening. 'Vluchteling als inspiratie'. De vrouw van ózze 'stehgeiger' reageerdje zich gesjaggerneerdj aaf oppe Mesjtreechse sjtummers die d'r veur gezörgdj höbbe det de PVV de grótste partie in ós hoofsjtad is gewaore. Mevrouw Rieu lag in die constatering 'n ein-op-ein relatie mit 't aafzètte vanne Limburgse bevolking taege vluchtelinge. 'n Relatie die waarsjienlik 'n kern van waorheid in zich haet, aevel weitesjappelik gezeen neet hel te make is.

Det köpke brach mich trök nao wie ich d'n daag nao de verkezinge mien waekelikse uurkes doorbrach bie 't gezin wo ich es taalcoach mien sjtinkendje bès doon óm 't Nederlands ónger de kneen te bringe. Mit de kinjer van 't gezin leep ich vas oppe sjterke wèrkwäörd wo 't Nederlands zoeë riek aan is. De verleje tied zów zoeë mekkelik kinne zeen. 'Ik stem', 'ik stemde', 'wij lachen' en 'zij lachten'. 'n Kindj kin de was doon. Dao kins se, es se in 't Arabisch bös opgegreujdj mit ónger de veut oet.

Wie anges is 't mit sjterke wèrkwäörd. Probeer 't mer 'ns oet te lègke. 'Zij komen', 'zij kwamen', 'wij vangen op', 'wij vingen op'. Lestig, lestig, 't Nederlands wo v'r hie mit z'n alle zoeë gruuëtsj op zeen, probere te verduutsje aan miense die d'r gèn bezej van höbbe. Mich insjpireertj 't, de vluchteling es ónoetputtelike bron van inspiratie. Woor 't allemaol mer zoeë vanzelfsjpraekend es: 'zij vluchten', 'zij vluchtten'.

© jan sjure, 22 mieërt 2017