trök nao: "columns"

kinnis

Wo geit 't allewiel nog allemaol euver? 'n Vraog die ich mich sjteeds dökker liek te sjtèlle. Zoeë vroog ich mich aaf of es Wu Wen 'n kopdeukske óm hej gehadj, de pandabaere ouch mit keuninklike ieër van 'n vleegveldj zówwe zeen aafgehaoldj. Ich vroog mich aaf wo det gezeik vanaaf koom euver wie ós sjoeële Paose viere, terwiel de gezètte vol sjtaon euver meubelboulevards die d'r op häör paosbes oetzeen.

Waem wètj zoeëwiezoeë nog waat Paose is of alles waat dao mit van doon haet. Ofsjoeën ich es jungske opgreujdje es zoon vanne köster mit alles waat dao bie koom kieke, mós ich 'n ein-twei-drie antjwaord sjöljig blieve wie mich vurrige waek emes vroog waat op Witte Dónderdig wurtj herdach. Ich mós d'r haer googele. Waat det betruf, bön ich zeker neet d'n insigste. In 'n actualiteiterubriek wórt aan luuj oppe sjtraot gevraogdj waat Paose is. Neet alle interviews zólle zeen óetgezónje, mer aevegood, ze hejje gèn bezej.

In 'n column inne Volkskrant bewaerdje Max Pam det de Nederlenjer den waal nog wètj det Paose 'ne vrieje daag is mit gekluuërdje eier, mer det 45% vanne Nederlenjers gèn idee haet wo Paose óm drejtj. Hae sjtèldje wiejer vas det 't feit det Jezus mit Paose nao d'n hemel is gevare, neet mieër toet ózze basiskinnis huuërtj. Det hoofdje ich mich noe 'ns net neet op te zeuke. Dao kriege v'r pas euver 'n paar waeke 'ne vrieje dónderdig veur.

© jan sjure, 19 april 2017