trök nao: "columns"

plat Limburgs

Aaf en toe luuës se get wobie se bie wieze van sjpraeke dien oeëre sjpits. Vergaef mich de oetdrökking, ich hej ouch kinne sjrieve wobie 'dich de ouge aope gaon', mer nao mien taalgeveul loesterendj, passe 'oeëre die gesjpitsj waere' ouch bie laeze baeter bie waat ich bedoel den 'ouge die aopegaon'. Meh good, in 'ne ingezónje breef inne gezèt sjaggerneerdje 'ne zekere Pierre Diedere oet Remunj zich euver 't feit det, wie oet de breef bleek alweer get jaore trögkes, plat Limburgs wórt gekaldj door de verplegers wie zien zeunke in 't Laurentius behanjeldj wórt aan zien gebraoke ermke.

Noe höb ich jaore in det eigeste Laurentius kinjer mit gebraoke ermkes behanjeldj en hej zoeë al drek 'n aardig plaetje bie 't verhaol. Van 't gewawwel óm 'm haer hej 't menke van nege ocherm nieks versjtange. Sjterker nog, 't veurval haet bliekbaar zónne indrök naogelaote det zoeëgaar jaore later nog ummer gèn haor op ziene kop d'r euver dinktj óm hie trök te kómme.

D'r sjtóng gelökkig nieks inne breef euver 'n sjlechte behanjeling of zoeë, ich hej, wiewaal ich mich det neet kin veursjtèlle, zoeëmer eine van die verplegers kinne zeen. Waat mich aevel sjtuuërdje in dae breef woor de oetdrökking 'plat Limburgs' die de taal mós oetdrökke die dao wórt gesjpraoke. Doe kins 'good' of 'belabberdj' Limburgs kalle, doe kins zoeëgaar 'plat' kalle, mer 'plat Limburgs' höb ich in mien jaore in Laurentius noeëts huuëre kalle.

© jan sjure, 3 mei 2017