trök nao: "columns"

archaïsch

Get gans aods, get oubolligs, get van vreuger, oet d'n tied, achterhaoldj en gedateerdj. Zoeëmer get synonieme veur 'archaïsch', 't waord det Willemijn Francissen, injredacteur kinnis bie de NTR, gebroekdje es argument det ein van mien favoriete televisieprogramma 't luuëdje mót lègke. Häöre indirecte baas, sjtaotssecretaris Dekker reageerdje toepasselik door te sjtèlle 't jaomer te vinje det dit iconisch grand-prixtoernooi veur linguïstische connaisseurs zoeë abrupt de pleiterik maaktj, mer det v'r neet zówwe mótte jeremiere euver dit fait accompli.

Hae hej d'r fiducie in det Hilversum neet zów gaon luiwammese, mer zich coûte que coûte zal inzètte óm eclatante successe oet archaïsche tieje te continuere mit exquise programmatische exercities óngerwiel heintjedavidseffecte vermiejendj. 't Zów zoeëmer 'n zin kinne zeen oet 't Groeët Dictee vanne Nederlandse Taal. 't Programma wovan ich mich neet herinner d'r oeëts 'n oetzending van gemisj te höbbe. En volges det eigeste geheuge ouch 't insigste programma wo ich mich mit pen en papier gewaopendj tegooj veur ging zitte.

Örges halverwaege november kós se in 'n saort veurrunj inne Volkskrant probere 'n sjteulke inne Ieëste Kamer te verdene. 't Is mich jaore achterein neet gelöktj, mer waat wils se mit 12.000 deilnummers vurrig jaor. 't Moog noe inins neet mieër, de kiekciefers bepaole waat op ós buze kumtj. Rollebollendje, quizzendje, dedaigneuze en kladderadatsch zejjendje BN'ers score bliekbaar baeter en waere bekans dageliks opgeveurdj. Laot mich den mer geweun archaïsch zeen, dao höb ich gelökkig 'n aan-oetknuupke veur.

© jan sjure, 31 mei 2017