trök nao: "columns"

brexit

Vurrige waek dinsdig knapdje d'r get. Inne Volkskrant wórt op 9 horizontaal óm 'n computerterm gevraogdj. Vief letters, ich hej 'n C, 'n A en 'n E. 't Mós 'cache' zeen. Op 12 van links nao rechs koom 'autocue', op 19 woor 'n filmopname 'n 'take'. De derdje letter van 12 horizontaal woor de ieëste van 't drieletterwäördje 'tie' waat den weer de oplossing mós zeen van waat v'r hie geweun gelieksjpel numme.Wie ich örges rechs óngeraan 'acts' mós invulle veur 't Nederlandse 'daden', hej ich 't good gehadj. Ich vónj 't waal, vergaef mich 't waord, 'enough'.

Woonsdig van 't eigeste lake 'n pekske, 'speed' woor sjnelheid, 'stock' veur 'veurraod', 'ne 'user' sjientj internet te gebroeke, en get wiejer 'crew', 'bytes' en 'camcorder'. Wie dónderdig de verticaal ingevuldje wäörd 'taster' opleverdje, noom ich al bekans aan det ich op 16 horizontaal es ómsjrieving 'preuver' zów taegekómme. Ich leet mich aevel aangenaam verrasse door 'veulsjpriet'.

Ich vinj Ingels 'n sjoeën taal die ich mich gaer inne móndj num. Ich moog 'ns gaer 'ne puzel invulle mer es ich daobie 't geveul krieg det ich 'n 'wannabe' Nederlands-Ingels waordebook ónger uig krieg, häök ich aaf. Wie ich d'r daodoor geprikkeld de vurrige waek 'ns tegooj op bön gaon lette, goof det waat ich oppe televisie veurgesjótteldj kreeg, neet ech väöl anges. De aansjtäöndje Brexit zów zoeëmer 'n sjoeën aanleiing zeen óm ouch ós taalgebroek 'ns duchtig op te sjuuëne.

© jan sjure, 28 juni 2017