trök nao: "columns"

dörpke

Dis waek wórt mich in 'n discussie veur de vot gesjörgdj det ich neet good wis waat zich zoeëal inne werreld aafsjpeeltj ómdet ich in 'n dörpke woon. Dao is natuurlik get veur te zègke. Ich woon neet in 'n sjtad wo vrachwages zich in Weinachtsmärkte of quatorze-juilletvierendje boulevards baore. Ich woon neet in 'n sjtad wo aansjlaeg op vleegveljer of discotheke plaatsvinje. Ich woon neet in 'n sjtad wo de aankoms vanne lèste touretappe op 'n oorlogsterrein liektj.

Ich woon inderdaad in 'n dörpke wo ich vurrige waek nog mit twieë van mien kleinkinjer nao 'n sjtampvol zjwumbad kós gaon zónger detectiepäörtjes of gefouilleerdj te waere. Ich woon in 'n dörpke wo, es op zónjigmiddig ós ieëste mót voetballe, gèn ME'ers bezeukendje toesjouwers nao 'n behèktj oetvak mótte leie.

Ich woon den waal in 'n dörpke, mer laes dao geweun zès keer per waek twieë gezètte. Es ich in det dörpke 'ns óm èlf oer in bèd ligk, loester ich nao 'mit 't oug op mörge'. Mien dörpke ligk aevel geweun in Nederlandj. 't Nederlandj wo in mien dörpke net wie in Amsterdam anti-islamtekste neet welkom zeen in böshuuskes en wo net wie in Rotterdam de teks "sjtop islam" neet thoes huuërtj op bösse. En es in mien dörpke 'n rechbank zów ligke, kreeg de bedinker van die tekste nul op rekes. Net wie in groeëte sjtaej haet vrieheid van meining ouch in mien dörpke gelökkig zoeë zien grenze.

© jan sjure, 26 juli 2017