trök nao: "columns"

veur sjpelle

Op 'neerlandistiek.nl', 'n internettiedsjrif mit de meis oeteinloupendje artikele euver taal, wurtj de lèste waeke 'n laevendige discussie geveurdj euver de sjpelling van 't Limburgs. Ich kós 't neet laote mich d'r in te minge. 't Begös mit de aankondiging det de populaire toetsebordapp 'SwiftKey', ein vanne puuëtjes van Microsoft, Limburgs geit. 't Is de software die veursjpeltj waat se wils gaon sjrieve. Es se 'fie' intiks, wurtj dich óngevraogdj 'fiets' veur de vot gesjörgdj.

SwiftKey lieërtj van zien gebroekers en wie mieër 'n bepaoldj waord wurtj gebroektj, wie waarsjienliker 't is det 't in 't veursjpellingsmodel terech kump. Det kriege v'r dus noe ouch veur 't Limburgs. Op 'androidworld.nl' loos ich: het typen van 'sto' wordt dan 'stoon' (= staan) en 'stja' wordt 'stjoan'. Vanaaf örges halverwaeges augustus haet 'n aantal gebroekers mit de oetprobeerversie kinne wèrke en 't sjientj det de definitieve versie ein van dis daag gelanceerdj is.

'ne Zekere Lars dae zich ouch inne discussie hej gemingdj, sjloog de kaeper vol op 't köpke door te sjrieve: "dus es de mieërderheid 't fout sjrief, wurtj 't toch es gooj sjpelling gezeen?" 't Zal mich benuje. D'r wurtj veursjpeldj det 't Limburgs sjrieve idderein mekkelik wurtj gemaaktj en det ós jeug massaal geit 'swiftkey-je'. En es v'r den toch aan 't nostradamusse zeen, veursjpel ich bie deze det 't Limburgs laeze d'r neet ech mekkeliker op geit waere. Gelökkig aevel haet veursjpelle nieks mit sjpelle van doon.

© jan sjure, 20 september 2017