trök nao: "columns"

Euro-Ingels

Zègktj noe zelf, 'sjtadslaeve' klinktj toch väöl sjónder es 'city-life'. Dis daag veel de 'glossy' mit dae naam weer door mien bös. 'We've got the power!' woor de titel van 'ne column. V'r wórte genuuëdj óm 'sparkling Christmas' te kómme viere. Exclusief wone in Remunj guf 'the view of high-end living'. Mer den woons se waal in de 'urban residence'. Ane Maasboulevard kins se 'think again' bie 'ne 'boost' mit 'ne 'bite'. 'New in town' op 't Sjtatieplein is 'Kings & Queens' terwiel inne binnesjtad 'n 'fashion event' plaatsvónj. V'r kinne ós gaon amusere op 'n 'halloween event', 'around the world in 70 years' en 'Santa's village Christmas dreams'.

V'r kinne alles waere es v'r 'on stage' gaon. Veur physiotherapie kinne v'r nao 't 'city centre', veur mieër kinne v'r in Herte nao 'people care', 'simply fit' of 'personal coaching'. Oppe Keulsebaan kriege v'r 'natural care for body & mind' en es v'r daonao de piep oet höbbe, wurtj ós vanne Sjuiteberg 'sleep well' gewunsj. Inne 'webshop' van 'city life' kinne v'r ós 'n 'big table' besjtelle. In Ittervoort kinne v'r nao de 'inspiration days' op 'n 'lifestyle event'.

Lès sjtóng 'Euro-Ingels' in 't tiedsjrif 'World Englishes'. 'n Artikel van 'ne Zjweedse professor euver 't meugelik zjwaker waere van 't Ingels in Europa nao de Brexit. Ich zów de professor gerösj wille sjtèlle en 'm wille nuuëje óm Remunj 'ns te kómme bezeuke. Hae zów gegarandeerdj weer röstig kinne sjlaope.

© jan sjure, 4 oktoeëber 2017