trök nao: "columns"

kal mer

Waat is de cultureel waerd van 'n regionaal taal? 'n Vraog die nogal 'ns gesjtèldj wurtj es v'r 't hie in Limburg euver 't Limburgs höbbe. Det Nederlandj dao historisch gezeen belang aan hechtj, bliektj waal oet de óngerteikening in 1996 van 't 'Europees Handvest voor Streektalen of Talen van Minderheden'. Dit Handjves sjtuit d'r veur det 't besjerme van historische Europese sjtreektale biedruuëgtj ane insjtandhaojing en óntwikkeling van cultureel riekdómme en tradities.

'ne Ganse móndj vol mer 't belang vanne óngerteikening van det Handves, haet geresulteerdj in de erkinning van drie regionaal tale in ós kwekkertelendje: 't Fries, 't Nedersaksisch (ó.a. Grunnings, Drents en Twents) en ós Limburgs. Wieväöl belang Nederlandj hechtj aan zien regionaal tale bliek waal oet 't feit det 't Ministerie van Binnelandse Zake en Keuningsrieksrelaties vurrige waek 'n congres organiseerdje ónger de titel 'Spreek maar', in good Limburgs: 'Kal mer'.

Wieväöl belang dit ministerie aan 'n good sjtreektaalbeleid hechtj, bleek ouch oet de äöpeningstoesjpraok vanne verantjwäördelike ambtenieër. Toch sjprook hae ouch zien teleursjtèlling oet richting Limburg. Veur dit congres wórte alle gemèndjes oet de drie regionaal talegebiede genuuëdj en vanoet 't Limburgse hej waalgetèldj ein gemèndje 'ne functionaris nao Deventer gesjtuurdj. Det gebrek aan belangsjtèlling mót ouch duchtig gepitsj höbbe bie Ger Koopmans, dae es ózze gedeputeerdje van cultuur 't congres móch aafsjloete. Ze hejje 't congres ouch neet vlak veur d'n èlfdje vanne èlfdje mótte organisere. Limburg hej vurrige waek mieër aansjpraekendje cultuur veur te bereie.

© jan sjure, 15 november 2017