trök nao: "thoes"

mien columns

Miene ieëste column sjreef ich op 15 december 2004 in de waekblajer van Oetgaeverie Gilsing. Bie ós in 't dörp versjeen die oetgaaf en 't 'Linner Nieuws'. D'r zeen d'r dao net gèn vieftig gepubliceerdj. Vanaaf november 2005 móch ich mien columns veur de Limburger gaon sjrieve. Iddere vriedigmörge sjtóng 'druimentaere' inne edities Remunj en Wieërt van dees gezèt.

Örges aan 't begin van 2016 kreeg ich 'ne breef vanne waornummendj hoofredacteur vanne Limburger det d'r gèn plaats mieër woor veur mien waekelikse druimerieje inne gezèt. Op vriedig de 13dje mei 2016 sjtóng miene lèste druimentaere inne Limburger, 't woor miene 594ste. 't Woor inderdaad op 'ne vriedig de 13dje. Noe vónj ich det zelf al 'ne óngelöksdaag veur de Limburgse taal, mer aafgäöndj oppe reacties die ich dao-op kreeg, wore dao hieël get mieër troew laezers neet ech gelökkig mit. Alle aope breve ane gezèt móchte neet bate. Nao 594 waekelikse columns móch ich mien pen ane wilge hange. 'n Paar reacties wil ich uch neet ónthaoje: op Leudal TV wórt sjanj gesjpraoke. Ouch L1 leet zich neet ónbetuugdj.

Op woonsdig 19 oktoeëber 2016 versjeen aevel nummer 595. Dis kieër neet mieër inne gezèt mer in 'n aantal oetgaves van 1Lokaal. En gezeen de reacties die ich op dae ieëste nuje column nao miene verplichdje sabbatical kreeg, woor ich dao neet allein gelökkig mit.

Mien ieëste 500 columns kintj g'r uch allemaol nog 'ns op eur gemaak naolaeze, wie 't zich huuërtj, aojerwèts in 'n lekker inne handj ligkendj book: 744.975 letters, 151.035 wäörd in 'ne goje kilo book en gebónje in 'n sjoeën glanzendje hel kaf.

Mien columns 501 toet en mit 625, en det wore mien lèste, zeen begin 2018 gebunjeldj. In dit book zeen ouch 'n aantal anger sjrieverieje van mien handj opgenómme.