trök nao: "thoes"

nuuj columns
"druimentaere 2.0"

Nao 13 december 2017 zeen d'r gèn gedrökdje columns mieër van mien handj versjene. Ouch veur waat betruftj neet gedrökdje columns höb ich 't d'r van genómme inne ieëste maondje van 2018.

Neet det ich nieks mieë sjrief, mer ich höb 't sjpeelveldj verangerdj. Ich bön nogal drök bezig gewaes óm get dinger die op mien vakgebied wore blieve ligke, aaf te wèrke. Ich haop dit jaor nog in idder geval nog twieë, en mesjien waal drie medische artikele te publicere. Mien passie veur sjpelling en alles waat daomit van doon haet, leek voltoeëjdj nao mien book: "Limburgs: wie sjriefs se det?". Nieks van det alles aevel. Ich bön bezig mit van alles te verzamele en veural te rangsjikke van alles waat mit de sjpelling van alle Nederlandse dialecte die ane Nederlandse kantj vanne Duitse grens gesjpraoke waere. Haopelik kin ich dao onnag 'ns 'n book euver publicere.

Mer waat columns sjrieve betruf, is toch 'n saort van laegdje óntsjtange. Zoeë noe en den gebeurtj d'r hie of dao 'ns get wovan ich dink: "es ich noe nog columns sjreef, den wis ich 't waal..."

D'n dröppel óm dae draod weer op te pakke, woor 't Groeët Limburgs Dictee det De Limburger same mit Veldeke Limburg organiseerdje. De finale van 't evenement wórt gehaoje op 12 juni en op d'n 13dje sjmörges vreug sjreef ich dao al 'n e-pöske euver aan get luuj womit ich regelmaotig meininge deil of van meining versil euver 't (gesjreve) Limburgs. Ónger 't köpke "tied veur bezinning" leet ich mich nog 'ns aojerwèts gaon. 'n Paar daag later, wie ich de ganse teks van 't Dictee, en veural wie 't allemaol volges de deskundige gesjreve hej mótte waere, ónger uig kreeg, deej dae dröppel miene ummer euverloupe.

Oppertied weer 'ns gaon ich mien gedachte op papier, in dit geval 'op 't werreldwied web, zètte.

Haoj 't inne gate en veural, väöl plezeer d'r mit en wie vanaods, ich huuër gaer van uch.