trök nao: "Limburgs wie sjrief ich det"

Sjpelling 2003 van
't Zittesj in 't kort

door Frans Walraven

1. de klinkesj
De klinkerteikes zeen wie in 't Nederlands.
Aevel, d'r zeen nog 'n paar apaarte teikes:
de è: deze klank kump veur in weurd wie: bèd, mès,(zich) oetrèkke;
de ö: deze klank kump veur in weurd wie: pöt, völle, gelök, sjtök;
de ó: deze klank kump veur in weurd wie: hóndj, móndj, bók (lèt op: neit ò, mer ó);
de ae: deze klank kump veur in weurd wie: kaetel, rae, sjtraeve;
de ao: deze klank kump veur in weurd wie: sjtraot, paort, haok;
de äö: deze klank kump veur in weurd wie: sjträötje, päörtje, päölke.
Sjrief nooit ee, oo, uu, aa als dat vanoet 't Nederlands gezeen verkeerd is.
Dus neit: vaader, mooder, kuuke, sjpeele, mer vader, moder, kuke, sjpele.

2. tweeklanke
Veurbeelde van Zittesje weurd bie meerklanke:
eej: (ich ) sneej "(ik) sneed";
aej: (ich) traej "(ik) treed";
ej: wejje, nej "waaien, gierig";
uuj : nuuj, luuj "nieuw, mensen";
euj: neuje "uitnodigen";
oew: moew "mouw";
aoj: (ich) braoj "(ik) braad";
aw: kaw, awd, hawf "kou, oud, half".
Kies in principe veur ou en neit veur au.
Natuurlik waal es 't Nederlands au haet: paus.
Dus: moud ("moed"), kous, houf ("hoef") en koum ("nauwelijks").

3. mitklinkesj
De mitklinkesj zeen wie in 't Nederlandjs. Ènkel bizunjer gevalle zeen:
de gk: dit teike kump veur in weurd wie: rögke, ligke, zègke, mögke;
de sj: dit teike kump veur in weurd wie: sjoon, sjool, sjael, sjiene, sjnaps;
de zj: dit teike kump veur in weurd wie: zjwaak, zjwans, zjwaegel, zjweite.
De j wurt in eine mitklinkergroep mer eine keer gesjreve op 't ènj.
Dus: blèndj, kèndj, kantj, landj.

4. t of d op 't ènj van weurd
Es 't woord in 't Nederlandjs op 't ènj 'n d haet, blif die in 't Zittesj bewaard.
Ouch es die d door 'n j gevolg wurt.
Mer es 't Nederlandjs gein veurbeeld mit d is, dan altied 'n t sjrieve, want die klink dao.
Dus: hóndj, landj, tandj, bèd naeve kat, rat, wèt.

5. 't kort weurdje te
De ónbeklemtoonde vórm van doe is te.
Dat is 'n woord.
Sjrief dat los van 't werkwoord.
Dus: kieks te, kumps te, leets te, paks te, es te kumps, es te dat leets .

6. de oetgangk -lijk
De oetgangk –lijk wurt gesjreve es –lik.
Dus: eindelik, muigelik, sjmakelik.

7. Internationaal weurd
Internationaal weurd waere in 't Zittesj zo väöl muigelik in de internationaal sjpelling gesjreve.
Dus: telefoon, televisie, diskette, computer, chatte, sms-e.