trök nao: "thoes"

= 't Limburgs =

De lèste tied höb ich nogal 'ns 'ne aovendj verzörgdj euver de Limburgse taal. Meistal goof ich mien presentatie de titel "Limburgs: waat 'n taal" mit. Dao kintj g'r mich altied veur vraoge, de presentatie wurtj aafgesjtumdj op 't gezelsjap woveur ze wurtj gegaove. Gemeinlik is de veurdrach aovendjvullendj, veur 'n oer of zoeëgaar de hèlf daovan besjtuit natuurlik ouch de meugelikheid.
De aovendjvullendje presentatie besjtuit oet twieë deile. Veur de pauze wurtj ingegange op de gesjiedenis van Limburg en 't Limburgs, de versjillendje dialecte in 't Nederlandse taalgebied mit natuurlik de meiste aandach veur 't Limburgs. Aan de handj van taalfragmente wurtj 't óngersjeid tösse de döks behuuërlik versjillendje Limburgse dialecte behanjeldj, wobie de belangriekste taalgrenze die door Limburg loupe de roeëje draod van 't verhaol zeen. Mer ouch 't Limburgs det aan beidskenj vanne päöl gesjpraoke wurtj, de Zittesje diftóngering of de veringelsing van 't Limburgs det v'r ós hie mit z'n alle allewiel inne móndj numme, kómme aan bod.
Nao de pauze wurtj oetgelagdj waat 't Limburgs zoeë uniek maaktj det 't in 1997 erkindj wórt es Europese regionaal taal.
Alle unieke versjille waere op 'n luchtige meneer oetgelagdj.


Móchtj g'r interesse höbbe in 'ne aovendj of 'n (half) uurke euver de Limburgse taal veur eur vereniging of bedrief, sjtuurtj 'n e-pöske nao: jan.sjure@druimentaere.nl. Euver de pries waere v'r 't waal ins.

--------------------------------------------------------------

= Limburgs sjrieve =

Regelmaotig verzörg ich cursusse ónger de titel: "Limburgs: wie sjriefs se det?", veur idderein dae gaer 'ns get in 't Limburgs sjrieftj, 'n unieke meugelikheid 'm zich hie-op bie te sjoeële.
De cursus wurtj gegaeve op drie aovendje, gemeinlik verdeildj euver drie opeinvolgendje waeke. D'r is gèn veurkinnis nuuëdig óm deil te numme.
Of 't noe is óm te twittere, te facebooke, 't samesjtèlle van 'n vastelaovesgezèt, 't sjrieve van limburgstalige leedjes of geweun ómdet g'r 'ns gaer get in good gesjreve Limburgs sjrieftj, nao dizze korte cursus, höbtj g'r alles inne pen óm det te doon volges de regels die in 2003 zeen vasgelagdj door de Raod veur 't Limburgs. Of ónger ós gezagdj en gezjwege, eigelik nog väöl mekkeliker.
't Maaktj neet oet in welke plaats g'r woontj, of g'r noe 't Mestreechs, Remunjs, Deelgaards, Siebengewalds, Geisters, Mechels of waat veur variant van 't Limburgs den ouch g'r ónger de knie en oet eur pen wiltj kriege, de cursus: "Limburgs: wie sjriefs se det?", guftj uch genóg handjvate.
Bie de cursus huuërtj get actueel hoeswerk. Ter aafsjloeting wurtj 'n klein dictee gehaoje.
Iddere deilnummer geit nao aafloup nao hoes mit 'n getuugsjrif en haet de meugelikheid óm zich 't book 'Limburgs: wie sjriefs se det?' taege 't gereduceerdje tarief van € 25.- aan te sjaffe (normale pries € 29,95).
De koste veur de hieële cursus zeen € 25.- euro per persoon bie 'n minimaal aantal van 15 deilnummers. Bie minder deilnummers waere v'r 't euver de pries waal ins.

'n Impressie van zoeë'ne cursus mit 't aafsjloetendje dictee en de oetreiking vanne getuugsjrifte is te zeen gewaes op ómreup 3ML. Es g'r op 't plaetje hie-ónger kliktj, waertj g'r nao 3ML doorverweze en kintj g'r d'r 'n paar minute aan preuve.

Móchtj g'r interesse höbbe óm veur eur vereniging of bedrief dizze cursus te organisere, sjtuurtj 'n e-pöske nao: jan.sjure@druimentaere.nl óm 't ein en anger te besjpraeke en te regele.

--------------------------------------------------------------

trök nao: "thoes"